اسم مصر على اسم مصر التاريخ يقدر يقول ما شاء أنا مصر عندى أحب وأجمل الأشياء بحبها وهى مالكة الأرض شرق وغرب وبحبها وهى مرمية جريحة حرب بحبها بعنف وبرقة وعلى استحياء واكرهها وألعن أبوها بعشق زى الداء واسيبها واطفش في درب وتبقى هى ف درب وتلتفت تلاقينى جنبها فى الكرب والنبض ينفض عروقى بألف نغمة وضرب على اسم مصر مصر النسيم فى الليالي وبياعين الفل ومرايه بهتانة ع القهوة .. أزورها .. واطل القى النديم طل من مطرح منا طليت والقاها برواز معلق عندنا فى البيت فيه القمر مصطفى كامل حبيب الكل المصرى باشا بشواربه اللي ما عرفوا الذل ومصر فوق فى الفراندة واسمها جولييت ولما جيت بعد روميو بربع قرن بكيت ومسحت دموعى في كمى ومن ساعتها وعيت على اسم مصر أنا اللى اسمي حتحـور .. أنا بنت رع مثـال الأمـومـة ورمـز الحـنـان تفـيض حـلمـاتى وتمـلا الـتـرع وتسـقـى البـشـر كلهـم والغـيـطان نهايته يا مصر اللي كانت أصبحت وخلاص تمثال بديع وانفه فى الطين غاص وناس من البدو شدوا عليه حبال الخيش والقرص رع العظيم بقى صاج خبيز للعيش وساق محارب قديم مبتورة ف أبو قرقاص ما تعرف اللي بترها سيف والا رصاص والا الخراب اللى صاب عقل البلد بالطيش قال ابن خلدون أمم متفسخة تعيش ليش وحصان صهل صحى جميع الجيش على اسم مصر
النخل فى العالى والنيل ماشى طوالى معكوسة فيه الصـور .. مقلوبة وانا مالى يا ولاد أنا ف حالي زى النقش فى العواميد زى الهلال الليى فوق مدنة بنوها عبيد وزى باقى العبيد باجرى على عيالى باجرى وخطوى وئيد من تقل أحمالي محنيه قامتي .. وهامتي كأن فيها حديد وعينيا رمل العريش فيها وملح رشيد لكني بافتحها زى اللى اتولدت من جديد
على اسم مصر مصر .. التلات أحرف الساكنة اللي شاحنة ضجيج زوم الهوا وطقش موج البحر لما يهيج وعجيج حوافر خيول بتجر زغروطة حزمة نغم صعب داخلة مسامعي مقروطة فى مسامى مضغوطه مع دمى لها تعاريج ترع وقنوات سقت من جسمى كل نسيج وجميع خيوط النسيج على نبرة مربوطة أسمعها مهموسة والا أسمعها مشخوطة شبكة رادار قلبي جوه ضلوعي مضبوطة على اسم مصر وترن من تانى نفس النبرة في ودانى ومؤشر الفرحة يتحرك فى وجدانى وأغاني واحشاني باتذكرها ما لهاش عد فيه شيء حصل أو بيحصل أو حيحصل جد أو ربما الأمر حالة وجد واخداني انا اللى ياما الهوى جابنى وودانى وكلام على لسانى جانى لابد أقوله لحد القمح ليه اسمه قمح اليوم وأمس وغد ومصر يحرم عليها .. والجدال يشتد على اسم مصر
موضوع: اسم مصر 
الأربعاء مايو 06, 2009 1:38 pm
